Language Reactor – bu sun’iy intellekt yordamida ishlaydigan Google Chrome brauzerining rasshireniyasi bo‘lib, u YouTube, Netflix kabi platformalarda til o‘rganishni ta’minlaydi. Foydalanuvchilar sevimli videolarini ikki til subtitrlari bilan tomosha qilish imkoniyatiga ega bo‘lishadi va bu orqali yangi so‘zlarni o‘zlashtirish osonlashadi.

Language Reactor’ning afzalliklari

Tillarni o‘rganishni qulay va qiziqarli qilish uchun yaratilgan ushbu vositaning uning quyidagi afzalliklari mavjud:

1. Subtitrlardan foydalangan holda o‘rganish: Siz filmlar, seriallar yoki videolarda ikki xil subtitrni bir vaqtning o‘zida ko‘ra olasiz. Bu so‘z va iboralarni kontekstda o‘rganish imkonini beradi.

2. So‘z boyligini kengaytirish: Har bir so‘zga bosganingizda uning tarjimasi va ta'rifi ko‘rinadi. Til o‘rganish jarayonini o‘zingizga moslashtirish uchun yangi so‘zlarni ro‘yxatga qo‘shib, yodlash imkoniyati mavjud.

3. Interaktivlik: Videolarni sekinlashtirish, qayta-qayta tinglash va subtitrlarni o‘zingiz xohlagan tilga tarjima qilish funksiyasi mavjud.

4. Maxsus lug‘at yaratish: O‘rganayotgan so‘zlaringizni lug‘at sifatida saqlab, ularni mustahkamlash uchun qayta ko‘rib chiqishingiz mumkin.

5. O‘rganish jarayonini shaxsiylashtirish: Platforma turli xil tillarni o‘rganayotgan foydalanuvchilar uchun moslashuvchan bo‘lib, o‘z darajangizga mos ravishda kontent tanlash imkonini beradi.

6. Turli platformalar bilan integratsiya: Language Reactor ko‘plab mashhur platformalar (masalan, YouTube, Netflix) bilan ishlaydi, bu esa o‘rganish jarayonini yanada qiziqarli va qulay qiladi.

7. Amaliy foydalanish: Tillarni tinglab va o‘qib o‘rganishingiz bilan bir qatorda, grammatikani tabiiy ravishda o‘zlashtirishingizga yordam beradi.

8. Bepul foydalanish imkoniyati: Platformaning ko‘plab funksiyalaridan bepul foydalanishingiz mumkin. Shuningdek, yanada kengroq imkoniyatlar uchun premium versiyasi ham mavjud.

Language Reactor qanday o‘rnatiladi?

Keling, ushbu rasshireniyani brauzerga qanday o‘rnatishni o‘rganamiz:

• Chrome kengaytmasini o‘rnatish: Google Chrome orqali Language Reactor ilovasini o‘rnatish mumkin.
• O‘rnatishdan keyingi sozlamalar: Ilovani ishga tushirgandan so‘ng, o‘z tilingiz va o‘rganilayotgan tilni tanlang.
• YouTube va Netflix sozlamalari: O‘rnatish tugagandan so‘ng, YouTube va Netflix kabi platformalarda avtomatik ravishda integratsiya qilinadi.

Language Reactor imkoniyatlari

Language Reactor’ning Netflix funksiyasi foydalanuvchilarga Netflix’da filmlar va seriallarni tomosha qilib til o‘rganish imkoniyatini beradi. Ushbu funksiya ayniqsa qiziqarli kontent orqali yangi til o‘rganishni istaganlar uchun juda foydali. Quyida Netflix funksiyasining asosiy imkoniyatlari keltirilgan:

1. Ikki til subtitrlari: Foydalanuvchi Netflix’da film yoki serial tomosha qilayotganda, bir vaqtning o‘zida ikkita til subtitrlari ko‘rsatiladi. Bu esa kontekstda yangi so‘zlarni o‘rganishga yordam beradi va tarjima qilish jarayonini osonlashtiradi.

2. Dublyaj qilingan filmlar uchun subtitrlar: Netflix’dagi dublyaj qilingan kontentlarda ham subtitrlarni ko‘rish imkoniyati mavjud. Bu orqali foydalanuvchi film ovozini original tilda eshitib, subtitrlar orqali mazmunini tushunishi mumkin.

3. Avtomatik tarjima: Language Reactor ba’zi videolar uchun mashinaviy tarjima funksiyasini taqdim etadi, bu esa tarjima bo‘lmagan kontentlarni tushunishni osonlashtiradi.

4. Interaktiv lug‘at: Subtitrlardagi so‘zlarga bosganda, so‘zning tarjimasi yoki lug‘at ma’nosi avtomatik ravishda chiqadi. Bu esa o‘rganilayotgan tilning so‘z boyligini tezroq o‘zlashtirishga yordam beradi.

5. So‘z va iboralarni saqlash: Foydalanuvchi qiziq so‘z yoki iboralarni saqlab qo‘yishi mumkin. Ular boshqa filmlar yoki seriallarda yana paydo bo‘lganda, ajratib ko‘rsatiladi. Bu so‘zlarni takrorlash va yaxshiroq esda qoldirishga yordam beradi.

6. Video boshqaruvi: Netflix videolarining tezligini o‘zgartirish orqali talaffuzni yaxshiroq tushunish va eshitish ko‘nikmalarini oshirish mumkin.

Language Reactor’ning Netflix funksiyasi foydalanuvchilarga filmlar va seriallar orqali jonli, kontekstga ega muloqotlarni tushunish, yangi so‘zlarni eslab qolish va talaffuzni o‘zlashtirishda yordam beradi. 

TurtleTube - Language Reactor’ning qismi bo‘lib, til o‘rganishni sekin va tushunarli qilish uchun maxsus mo‘ljallangan. “Turtle” (toshbaqa) so‘zi bilan bog‘liq bo'lib, bu platforma foydalanuvchilarga tushunish uchun qiyinchilik tug‘dirmaydigan videolarni topish va ulardan o‘rganish imkonini beradi. TurtleTube’da murakkablik darajasi past bo‘lgan, sekin va aniq talaffuz qilinadigan videolar mavjud, bu esa ayniqsa boshlang‘ich va o‘rta darajadagi til o‘rganuvchilar uchun juda foydali hisoblanadi.

Elektron kitoblar va vebsaytlar - Matnni yuklaysiz, Language Reactor tilingizga avtomatik tarjima qo‘shadi va real ovozli o‘qish orqali matnni o‘qib beradi. (bu funksiya yaqin kunlarda ishga kiradi)

Nimani o'rganish lozim? - Language Reactor sizga qaysi so‘zlarga e’tibor qaratish va qaysilarini o‘tkazib yuborish kerakligini tavsiya qiladi, bu esa o‘rganish jarayonini tezlashtirishga yordam beradi. O‘rganishni istagan so‘zlaringizni saqlab qo'ysangiz, ular qayta paydo bo‘lganida ajratib ko‘rsatiladi.

Chatbot - Ushbu funksiya foydalanuvchilarga til o‘rganishda yordam berish uchun sun’iy intellekt bilan muloqot qilish imkonini beradi. Bu funksiyaning asosiy maqsadi – foydalanuvchilar uchun suhbat orqali til ko‘nikmalarini rivojlantirish, yangi so‘z va iboralarni kontekstda o‘rganish va muloqot qilish qobiliyatlarini oshirishdir.

Chatbot foydalanuvchining til darajasiga moslashib, unga qiziqarli va foydali savol-javoblar yoki mashqlar taqdim etadi. Bu orqali foydalanuvchi til o‘rganish jarayonini interaktiv va qiziqarli qilib, haqiqiy suhbatlardagidek tajribaga ega bo'ladi.

Language Reactor tariflari va narxlari

Language Reactor dasturi bepul versiyaga ega bo‘lib, asosiy funksiyalaridan foydalanish imkonini beradi. Biroq, qo‘shimcha imkoniyatlar va kengaytirilgan funksiyalar uchun pullik obuna taklif etiladi. 

“Pro” rejimi qo‘shimcha quyidagi imkoniyatlarga ega:

Pro tarifida yuqoridagi bepul tarifga qo‘shimcha ravishda: So‘z va iboralarni saqlash, dublyaj qilingan filmlar uchun subtitrlar (Netflix), mashinaviy tarjimalar (Netflix) va dasturchilarni qo‘llab-quvvatlash imkoniyatlari yaratilgan.

"Pro" rejimi narxlari:

• Oylik: 6$ (taxminan 72 ming so’m).
• 3 oylik: 14$ (taxminan 168 ming so’m).
• Yillik: 40$ (taxminan 480 ming so’m).

*Eslatma: Narxlar dollar kursiga qarab o‘zgarishi mumkin.

Language Reactor kamchiliklari

Ushbu kengaytma foydali til o‘rganish vositasi bo‘lsa-da, ba’zi kamchiliklarga ham ega:

• Cheklangan platformalar: Bu dastur asosan faqat YouTube va Netflix bilan ishlaydi. Agar boshqa platformalardan foydalanmoqchi bo‘lsangiz, dastur yordam bera olmaydi.
• O‘rganish uchun vaqt talab etadi: Dasturda ko‘p funksiyalar bor, shuning uchun yangi foydalanuvchilar barcha imkoniyatlarni o‘zlashtirish uchun biroz vaqt sarflashlari kerak.
  
• Barcha tillar qo‘llab-quvvatlanmaydi: Kamdan-kam ishlatiladigan tillar uchun kontent yoki subtitrlar yetarli emas, bu esa o‘rganishni biroz qiyinlashtiradi. (hozircha o’zbek tili yo’q)
  
• Internet talab qiladi: Language Reactor ishlashi uchun internet kerak. Internet sifati yomon bo‘lsa, video va subtitrlar sinxronlashmasligi mumkin.
  
• Maxfiylik: Dastur brauzerda ishlagani uchun ba’zi foydalanuvchilar maxfiylik masalasida xavotirda bo‘lishi mumkin.

Language Reactor'ning rasmiy veb-saytiga ushbu havola orqali kirish mumkin: Language Reactor.

Ushbu platformaning rasmiy saytida dasturdan foydalanish interfeysi, shablon videolar va kitoblar berilgan. Shuningdek, batafsil ma'lumotlar, o'rnatish yo'riqnomalari va qo‘llab-quvvatlash xizmatlari mavjud.